Жол ҳәрекети қағыйдаларына итибарсызлық. Ҳуқықбузар А.А. 2022-жыл 18-июнь күни саат 22:00 лар шамасында Нөкис қаласы Қоскөл елаты ишки жолы менен өзиниң басқарыўындағы «Нексия-3» маркалы автомашинасын басқарып баратырып, Өзбекстан Республикасы «Жол ҳәрекети қағыйдалары»ның 12-бәнтинде көрсетилген яғный «Айдаўшыға төмендегилер жол қойылмайды: транспорт қуралын мәслик ҳалатында (алкоголь, наркотик затлар пайдаланған ҳ.т.б), сезгирлик ҳәм итибарды пәсейтетуғын дәрилер тәсиринде, жол ҳәрекет қәўипсизлигине қәўип туўдыратуғын дәрежедеги шаршаў ҳәм бийтап ҳалатында басқарыў» ҳәм де 73-бәнтиндеги “Айдаўшы өзиниӊ алдындағы кетип баратырған транспорт қуралы бирден тоқтағанда оныӊ менен дүгисип кетпеўи кепиллигин беретуғын арадағы қашықлықты (дистанция) сондай-ақ, жол ҳәрекети қәўипсизлигин тәмийнлейтуғын қаптал аралық қашықлықты (интервал) сақлаўы керек” деп көрсетилген талапларын бузып, Нөкис қаласы Қоскөл елаты ишки жолында өзи менен бир бағытта хәрекетленип баратырған А.Ж.ниң басқарыўындағы «Нексия-2» автомашинасына барып урылған ҳәм нәтийжеде автомашиналарға материаллық зыян жеткерилгенлиги анықланған. Бул ис-ҳәрекетлери менен ҳуқықбузар А.А Өзбекстан Республикасы ҲЖҳКниң 133-статьясында көрсетилген ҳуқықбузарлықларды ислеген. Ҳуқықбузар А.Атың ис-ҳәрекетлери, оның суд мәжилисиндеги көрсетпесинен тысқары, истеги болған ўақыя ҳаққындағы мәлимлемеси, ўақыя болған жерди көзден өткериў ҳаққындағы баяннамасы, сызылмасы ҳәм фотосүўретлери, ҳуқықбузар ҳәм жәбирлениўшилердиң дәслепки түсиник хатлары ҳəмде ис бойынша топланған басқада ҳүжжетлер жыйындысы менен толық тастыйықланады. Ҳуқықбузар А.А Өзбекстан Республикасы ҲЖҳКниң 133-статьясы ҳәм 136-статьясы 1-бөлиминде нәзерде тутылған ҳуқықбузарлықларды ислеген деп табылып, оған тайынланған жазалар Өзбекстан Республикасы ҲЖҳКниң 34-статьясына тийкар үзил-кесил жаза аўыррақ ҳәкимшилик жазаны нәзерде тутыўшы санкция шеңберинде 1 (бир) жыл 6 (алты) ай мүддетке транспорт қуралын басқарыў ҳуқықынан айырып, базалық есаплаў муғдарының 15 (он бес) есеси, яғный 4.500.000 сўм муғдарында жәрийма жазасы тайынланды. Ис бойынша, А.Жтың басқарыўындағы “Нексия-2” маркалы автомашинасына келтирилген 9.758.032 сўм муғдарында материаллық зыянларды жәбирлениўши А.Жтың пайдасына ҳуқықбузар А.А.тан өндирилиўи белгиленди. Суд тәрепинен ис бойынша тәреплерге келтирилген материаллық зыянлар бойынша қамсызландырыў компанияларына мүрәжат етиў ҳуқықы бар екенлиги түсиндирилди. Жынаят ислери бойынша Нөкис қалалық суды судья жәрдемшиси Зияда Исметуллаева 11:14 /23-Avgust, 2022-yil |